БИШКЕК, 23-ноя. — Sputnik. Футбол боюнча улуттук курама команда Эл аралык футбол федерациясынын жаңыланган рейтингинде беш сапка жогорулап, көрсөткүчүн жакшыртты. Бул тууралуу маалымат аталган уюмдун сайтына жарыяланды.
Жаңы түзүлгөн тизмеде Кыргызстан 115-орунду ээлеп турат, бир ай мурун 120-сапта экени айтылган.
Беш тепкичке өйдөлөөгө улуттук команданын Макао курамасын 4:3 эсебинде жеңип алганы өбөлгө болгон.
Айдын мыкты командасы деп дароо 18 сапка жогорулаган Түндүк Кореянын футболчулары аталып, 114-орунду ээледи. Ал эми начар болуп 22 тепкичке ылдыйлаган Лаос командасы табылды.
Биринчи орунду мурдагыдай эле Германиянын футболчулары бербей келет. Экинчиде Бразилия турса, үчүнчү сапты Португалия ээлеген.
Кийинки рейтинг 21-декабрда жаңыланат.
