БИШКЕК, 22-ноя. — Sputnik. Токтогул ГЭСине 260 тонналык блоктук трансформатор жеткирилгенин "Улуттук энергохолдинг" ААКсынын маалымат кызматынан билдиришти.
Агрегат "Энергетика секторун реабилитациялоо" долбоорунун алкагында жеткирилди.
"Трансформаторду алып келүү маалында команда бир катар көйгөйлөргө туш болду. Агрегаттын жана атайын машинанын жалпы салмагы 320 тоннага жеткендиктен, аларды ташып келе жаткан техника улам иштен чыгып, аны алмаштырууга туура келди. Ошондой эле аба ырайынын шарттары дагы тоскоол болду", — деп айтылат маалыматта.
"Кытайда чыгарылган жабдуу Кыргызстанга Казакстан аркылуу Чунжа — Шелек — Алматы — Отар — Луговое — Тараз маршруту менен келди. Трансформаторду бир аз эртерээк жеткирүү пландалып жаткан. Бирок Кытайдын Гуожигоу аймагында көпүрөнү сел жууп кеткендиктен, жүк кармалып калды", — деп айтылат маалыматта.
Токтогул ГЭСинде монтаж иштери уланууда. Блоктук трансформатор декабрь айында ишке киргизилет.
