БИШКЕК, 22-ноя. — Sputnik. Ош шаарында "Жаш мугалим — 2018" сынагы өткөрүлөт. Бул тууралуу шаардык билим берүү башкармалыгынын усулдук борборунун жетекчиси Кумарбек Раманов билдирди.
Аталган сынак жаш мугалимдерди шыктандыруу максатында өткөрүлүп жатат.
"Жаш педагогдор биринчи баскычта мектеп сынагынан өтүшөт. Андан жеңгендер 5-декабрга чейин шаардык билим берүү башкармалыгына билдирүү жибериши керек. Шаардан тандалган мугалимдер ачык сабактарды өтүп, андан тышкары, педагогикадагы түрдүү багыттар боюнча күч сынашат. Финалдык бөлүгү кийинки жылдын май айында өткөрүлөт", — деди Раманов.
Белгилей кетсек, жыл сайын республика боюнча өтүүчү "Жылдын мыкты мугалими" конкурсуна эмгек тажрыйбасы 3 жылдан кем болбогон мугалимдер катышса, бул сынакка эмгек тажрыйбасы 3 жылдан ашпаган жаш мугалимдер катышмакчы.
"Жаш мугалим — 2018" сынагы Жогорку Кеңештин депутаты Абдывахап Нурбаевдин демилгеси жана демөөрчүлүгү менен уюштурулууда.
