БИШКЕК, 21-ноя. — Sputnik. Кыргызстанда айыл чарба техникасы, жеңил унаа менен автобустар чыгарыла баштайт. Бул тууралуу Sputnik Кыргызстан агенттигине Инвестицияны илгерилетүү жана экспорт боюнча мамлекеттик агенттиктин жетекчиси Нурадил Баясов айтып берди.
Өлкө аймагында төмөнкү ишканаларды ачуу пландалып жатат:
— автобустарды SKD-чогултуу боюнча;
— айыл чарба техникасын чогултуу боюнча;
— "ДжиЭм Узбекистан" акционердик коомунан чыккан жеңил автоунаалардын дилерлик борборлору;
— "Узавтосаноат" жана "Автоцентр Эстакада" компанияларынын жеңил унааларын биргелешип чогултуу боюнча.
Рынок, ишкана жана тейлөө кызматы ассоцияациясынын президенти Сергей Пономеровдун айтымында, заводдорду 2019-жылы пайдаланууга берүү пландалууда.
"Өзбекстандык инвесторлор Кыргызстанда эконом-класстагы кореялык жеңил унааларды чогултуу жана сатуу боюнча өз аянттарын ачууга даяр. Мындай машиналардын газ менен жүрүп, баасы да жеткиликтүү болушу каралууда", — деди эксперт.
Пономорев жаңы унааларга акчасын үстөксүз бөлүп төлөө шарты каралып жатканын белгиледи. Мындан улам эконом жана орто класстагы унаалардын кайра сатуудагы баасы түшө турганы божомолдонуп жатат.
Заводдон чыккан продукция Кыргызстан менен ЕАЭБ аймагында сатылмакчы.
