БИШКЕК, 21-ноя. — Sputnik. Кыргызстандык интернет колдонуучулардын арасында туристтердин күн батып баратканда күмбөзгө чыгып алып түшкөн сүрөтү бир топ нааразычылыктарды жаратты.
Сүрөттө туристтердин Кыргызстандагы күмбөздөрдүн бирине чыгып алганы тартылган.
Сүрөттөгү туристтер Свен менен Жулия Сучанек. Алар саякат тууралуу The Travel Tellers аттуу блогду жазышат.
Сүрөт түгөйлөр Орто Азияны кыдырып жүргөн маалда 2015-жылы ноябрда тартылган.
"Борбор Азиядан жаңы эле чыктык. Бул жактан көргөндөрүбүздү сөз менен айтып жеткире албайбыз. Бул жерде жашаган адамдар жана табияты башка мамлекеттерден бир топ айырмаланат. Чөлдөн тарта кар баскан тоолорго чейин, мусулмандардан правословдарга чейин, чарчоодон үйлөнүү үлпөт тоюна чейин. Булардын бардыгы башкача, ошол эле учурда бир мамлекеттин ичинде. Мунун бардыгын сиздерге кантип жеткиребиз, билбейм", — деп саякатчылар Орто Азияга болгон сапарынын жыйынтыгы менен бөлүшкөн.
Гамбургдук жуптар Свен менен Жулия Сучанек бир нече жылдан бери дүйнө кезип жүрөт. Алар өз саякатын Борбор Азиядан баштап, бүгүнкү күнү 49 мамлекетти кыдырууга үлгүрүшкөн. Түгөйлөр саякат учурунда көргөн-билгендеринин бардыгын The Travel Tellers блогуна жана Instagram менен YouTube баракчаларына жарыялап турат.
