БИШКЕК, 11-ноя. — Sputnik. Президент Алмазбек Атамбаев Улуттук банктын төрагасы Кубанычбек Кулматовду кабыл алып, ага сомдун наркын туруктуу сактоо тапшырмасын берди. Бул тууралуу өлкө башчынын маалымат кызматынан кабарлашты.
"Жолугушуу маалында президент улуттук валютанын алмаштыруу курсунун туруксуздугун жөнгө салуу, банк жана төлөмдөр системасынын коопсуздугун, инфляция деңгээлин кармоо боюнча жасалып жаткан иштер тууралуу кабардар болду", — деп айтылат билдирүүдө.
Өлкө башчы республиканын аймагындагы финансы жана насыялык кызмат көрсөткөн ишканалардын ишмердүүлүгүн бекемдөө жана турукташтыруу зарыл экенин баса белгиледи.
Эскерте кетсек, доллардын баасы 22-октябрдан тарта өсүп, бүгүнкү күндө сатып алуу — 1 сом 35 тыйынга (бүгүн 69,7 сом), сатуу — 1 сом 45 тыйынга (69,95 сом) кымбаттады.
Ал эми Улуттук банк 8 жана 10-ноябрь күндөрү 22,55 миллион долларды сатыкка чыгарган.
