БИШКЕК, 9-ноя. — Sputnik. Бишкекте үч күн бою жоголуп кетип табылган мектеп окуучусу кайрадан өз мектебине окууга киргизилди. Бул тууралуу Sputnik Кыргызстандын кабарчысына окуучунун апасы Зарылбүбү Алымбекова билдирди.
Эске салсак, борбор калаадагы №32 мектептин 9-классынын окуучусу 26-октябрь күнү мектеп директоруна таарынып, үйүнөн качып кеткен.
"Биз мектеп директору жана баламдын класс жетекчиси менен сүйлөшүп, бири-бирибизден кечирим сураштык. Директор Асел Садыкова балама "кол тийгизбейм" деп сөз берди", — деди Алымбекова.
Алымбекова чуулуу окуядан кийин өз өмүрүнө кол салууга аракет кылган класс жетекчи Жумакан Каниметова дагы жумушка чыкканын кошумчалады.
Окуучунун кайрадан окууга алынганын №32 орто мектептин директору Асел Садыкова дагы тастыктап берди. Анын айтымында, өспүрүмдө мектептен чыгарып салуу эмес, окуусунан жетишпей жаткандыктан кечки мектепке которуу планы каралган.
