БИШКЕК, 9-ноя. — Sputnik. Борбор калаадагы дайынсыз жоголуп кетип үч күндөн кийин табылган окуучу билим алган №32 мектеп коррупцияга малынган. Бул туурасында Жогорку Кеңештин депутаты Тазабек Икрамов парламентте ар кандай маселелер каралып жатканда билдирди.
Анын айтмында, мектептерди тез арада текшерип чыгуу керек. Эл өкүлү мектепте чогултулган каражат айына 100 сомдон ашпашы керектиги жана жакыр үй-бүлөлөрдүн балдарына акысыз билим берүү мыйзамда көрсөтүлгөнүн белгиледи.
"Баш мыйзамда мектепте окуу акысыз экени жазылганы менен иш жүзүндө башкача болуп жатат. Бишкектеги №32 мектептин окуучусу дайынсыз кетип, үч күндөн кийин табылган. Ал мектеп директору менен класс жетекчиси акча алып келбейсиң деп басынтканын айткан. Мектеп жамаатына доо коюудан алысмын, бирок акча чогултуу чектен ашып жатат", — деди Икрамов.
