БИШКЕК, 6-ноя. — Sputnik. Трансплантологиянын жетишкендиги менен эркектер "эртең эле" бала төрөй башташат. Бул тууралуу Американын репродукциялык медицина коомунун президенти Ричард Полсон билдиргенин РИА Новости жазып чыкты.
Ричард Полсондун айтымында, жатынды алмаштыруу жакынкы аралыкта бир гана аялдарга эмес, эркектерге да жеткиликтүү боло баштайт. Адис мындай операцияга суроо-талап көп болоорун күтүп жатканын айтып, хирургиялык жол менен жынысын алмаштыргандардын саны да өсөөрүн айткан.
"Сиз бул нерсени эртең эле жасасаңыз болот. Бир аз кыйынчылыктар бар, бирок бул тармакта ишке ашпагандай олуттуу деле көйгөй көрө алган жокмун", — деп дарыгерлердин бири Сан-Антониодо өтүп жаткан репродукциялык медицина тармагынын адистеринин съездинде билдирди.
Бүгүнкү күндө жатынды алмаштыруу боюнча тогуз операция ийгиликтүү аяктаган. Бул тармакта швед дарыгерлери мыкты адис деп саналат.
