БИШКЕК, 1-ноя. — Sputnik. Бокс эрежелери боюнча Флойд Мэйвезерге утулуп калган Конор Макгрегор эми атаандашын эрежесиз эр уруш ыкмалары менен беттешүүгө чакырык таштады. Бул тууралуу РИА Новости агенттиги Boxing Scene уюмуна шилтеме кылуу менен билдирди.
Эске салсак, Флойд Мэйвезер менен Конор Макгрегор 26-августта Лас-Вегас шаарында беттешип, 10-раундда техникалык нокаут менен Мэйвезер жеңишке жеткен. Мелдештен кийин Флойд карьерасын аяктай турганын айткан.
Ал эми Макгрегор (UFC версиясынын жеңил салмак категориясы боюнча чемпион) бокс эрежелери боюнча рингге биринчи жолу чыккан.
Конор беттештен кийин боксчулардын бири эми эрежесиз эр уруш боюнча аны чакырышы керектигин айткан.
"Балким Малиньяжи же Флойд ММА эрежелери боюнча мушташууга макул болор. Мен алардын дүйнөсүнө келип, күйөрмандарыма шоу тартууладым", — деди ал.
Малиньяжи IBF (2007-2008) жана WBA (2012-2013) версиялары боюнча орто салмак боюнча мурдагы дүйнө чемпиону. Ал Макгрегорго Мэйвезер менен болчу беттешке даярданууга жардам берген. Бирок Макгрегор машыгуу учурунда Малиньяжини нокаутка чаптым деген сүрөттү социалдык тармакка жарыялап жибергенде андан кетип калган.
