БАТКЕН, 22-окт. Sputnik. Баткенге көмүлгөн мумияны күнү-түнү кайтарууга мүмкүнчүлүк жок экенин, бирок бейиттин айланасы темир тосмо менен тосула тургандыгын Кара-Булак айыл өкмөтүнүн башчысы Ачылбек Бекташов Sputnik Кыргызстан агенттигине билдирди.
Айыл өкмөттүн пикиринде, археологиялык аймакка көмүлгөн мумия уурдалбайт.
"Мумияны эч ким уурдабайт деп ойлойм, себеби борбордогу тарых музейи эки жолу өрттөндү. Эгерде мумияны уурдоого кызыкдар адамдар болсо, ошол мезгилден пайдаланып уурдамак да", — деди Бекташов.
Кошумчалай кетсек, мумияга Кара-Булак айылынын аксакалдары мал союп, куран түшүрүштү. Буга чейин ЖК депутаты, мурдагы маданият министри Рыскелди Момбеков убагында мумияны 500 миң долларга чет жакка алып чыгуу сунуштары болгонун белгилеген.
