БИШКЕК, 29-сен. — Sputnik. Премьер-министр Сапар Исаков Россияга болгон расмий иш сапарынын алкагында Мамлекеттик Думанын башчысы Вячеслав Володин менен жолукту. Бул тууралуу өкмөттүн маалымат кызматы билдирди.
Исаков кыргыз-орус мамилеси туруктуу өнүгүп жатканын белгилеп, Россия тарапка жылуу кабыл алганы үчүн ыраазычылык билдирди.
Ал ошондой эле Володиндин жайында Кыргызстанга болгон иш сапары эки өлкөнүн мамилесинин чыңдалышына өз салымын кошконун белгилеп, Кыргызстандын ЕАЭБге кошулушу өлкө экономикасынын өнүгүүсүнө жакшы шарт түзгөнүн айтты.
"Бүгүнкү күнү биздин ишканалар чынында жанданып калды. ЕАЭБ алкагында киргизилип жаткан стандарттар чыгарылып жаткан продукциянын сапатын жакшыртууга шарт түздү. Россиянын жардамынын аркасында лабораториялар менен көзөмөл-өткөрүү пунктулары жабдылды", — деди ал.
Ошондой эле эки тараптуу кызматташуу достукка жана ишеничке негизделгенин белгиледи.
Белгилей кетсек, Сапар Исаковдун Россияга болгон расмий сапары эки күнгө созулат. Анын алкагында бир катар иш-чараларга катышат.
