БИШКЕК, 25-сен. — Sputnik. Кыргызстандыктар Айбек Күренкеев жана Айбек Надырбеков Ironman титулуна ээ болду. Бул тууралуу уюштуруучулардын расмий сайтында маалымдалды.
Мелдеш 23-сентябрда Италияда өткөн. Катышуучулар төрт чакырымга сүзүп, 185 чакырымды велосипед менен өтүп, 42 чакырым аралыкка тынымсыз чуркашкан. Күренкеев бул аралыкты 12 чаат 53 мүнөт 48 секундда багындырса, Надырбеков марага 13 саат 16 мүнөт 23 секундда келген. Кыргызстандык эки спортчу тең 30 жашта.
Күренкеев Facebook баракчасына жарыш учурунда бир катар кыйынчылыктарга кабылганын жазды.
"Тоого чыгып баратканда велосипеддин чынжыры үзүлүп калды. Мен жыгылып, педаль дагы чыгып кетти. Андыктан 35 чакырымды бир педаль менен тээп өттүм. Ошол жерден тамак-ашымды да жоготуп алдым", — деди Күренкеев.
Ironman — узак аралыкка болгон жарыш, аны триатлон боюнча бүткүл дүйнөлүк уюму уюштурат. Анын алкагында катышуучулар төрт чакырымга сүзүп, 185 чакырымды велосипед менен өтүп, 42 чакырымга чуркашат. Аталган триатлон дүйнөдөгү эң оор мелдештердин катарын толуктайт.
Буга чейин беш кыргызстандык "темир киши" аталган. Алардын катарында КР триатлон федерациясынын вице-президенти Канат Келсинбеков, ишкер Чыңгыз Алканов жана жалгыз аял Юлия Фернас бар.
