БИШКЕК, 15-сен. — Sputnik. Премьер-министр Сапар Исаков жабык имаратта өтө турган аскер өнөрү боюнча V Азия оюндарына катышчу спортчуларды узатуу салтанатына катышып, улуттук курама команданын капитаны Калы Сулаймановго Кыргызстандын желегин тапшырды. Бул тууралуу өкмөттүн маалымат кызматы билдирди.
Желекти алган Сулайманов боло турчу мелдеште өлкө намысын коргоо үчүн бардык аракеттерди жумшай турганын айтты.
Ал эми Исаков өз сөзүндө эл аралык спорттук мелдештерде өлкө намысын талашып жүргөн спортчулар менен сыймыктана турганын баса белгиледи.
Ал ошондой эле ата мекендик спортту өнүктүрүү үчүн өкмөт колдон келген аракетин жасай турганын айтты.
Жабык имаратта өтө турган аскер өнөрү боюнча V Азия оюндары 17-сентябрдан 27-сентябрга чейин Түркмөнстандын борбору Ашхабад шаарында болот. Кыргызстандын улуттук курама командасында 153 спортчу бар, алар спорттун 17 түрү боюнча күч сынашат.
