БИШКЕК, 12-сен. — Sputnik. Режиссер Таалайбек Кулмендеевдин "Мунабия" тасмасынын дүйнөлүк премьерасы Түштүк Кореяда өтөт. Бул тууралуу продюсер Талантбек Төлөбеков билдирди.
Анын айтымында, тасма 12-21-октябрь аралыгында Түштүк Кореяда өтө турган Пусан эл аралык кинофестивалында тартууланат.
"Кыргыз киносунун премьерасы 13-октябрь күнү Busan Cinema Center борборунда көрсөтүлөт. Ошондой эле үч ирет, 13-19-20-октябрда көрүүчүлөрдүн назарына тартууланат. Кинонун бардык убактысы прайм тайм учуруна коюлган", — деди Төлөбеков.
Тасма 70 миң долларга тартылып, 71 мүнөткө созулат. Кыргыздардын Ромео менен Жульеттасынын сүйүү тарыхын чагылдыраган тасма белгилүү жазуучу Казат Акматовдун "Мунабия" новелласынын негизинде тартылган. Чыгарма 1970-жылы "Жылдын эң мыкты чыгармасы" деп таанылып, сыйлыкка татыганы белгилүү.
