БИШКЕК, 9-сен. — Sputnik. Премьер-министр Сапар Исаков жол эрежесин бузган айдоочусун жазага тартат. Бул туурасында өкмөттүн маалымат кызматынын жетекчиси Гүлнура Төралиева Sputnik Кыргызстан маалымат агенттигине айтты.
Буга чейин премьер-министр Кыргызстандагы жалпыга маалымдоо каражаттарынын бирине маек берген. Журналист өкмөт башчы менен бир машинада кетип бара жаткан. Бул учурда аларды тартып бара жаткан оператордун видеосуна Исаковдун кызматтык автоунаасынын оңго бурула бергенде жөө адамдар өтчү жерден кишини кое бербей койгондугу түшүп калган.
"Бардыгы кызматына жана чинине карабай жол эрежелерин сактоого милдеттүү. Эгерде бузса, жазага тартылышы керек", — деген Исаков.
Өкмөт башчы бул тууралуу маалымдар кылган социалдык тармактын колдонуучуларына рахматын айткан.
Буга чейин өкмөт башчысынын социалдык тармактарда талкууга алынган өкмөт мүчөлөрү боюнча чара көрөрүн айтканы бар.
