Манас, Манас болгону
Манас атка конгону…
Манасты көздүн карегиндей сактап, жан дилин берип, өзүн ошол дүйнөгө арнап койгон манасчылар Тыныбектин, Акылбек, Назар, Балыкооз, Найманбай, Сагынбай, Саякбай, Шапак аталардын арбагына таазим эттим. Өзгөчө Каныбек Иманалиевдин "Саякбай" китебин окугандан кийин залкар манасчынын заманында жашагандай, кошо жүргөндөй, турмушунун ачуу-таттуусун бирге таткандай эргигем.
Эми мен ошол залкар Саякбайдын, улуу Саякбайдын аянын көрдүм… Кудум китептен окугандай… Кичинекей Саякбайды кой кайтарып жүргөн жеринен тосуп чыккан Каныкей энени көрдүм, буудандарын алкынтып опол тоодой болгон Эр Манасты, Алмамбет баатырды, акылман Бакай бабаны көрдүм…
Илгери "Чоң казатка баргандан кийин Манас ата Бээжинге жатып албай бирөөнү дайындап коюп, кыргыз жергесине келе бербейт беле, жекеге чыккан Коңурбайды жыккандан кийин Алгарасын бербей койбойт беле" деп күйүп-бышып жүрүп, "Манас бабам менен баарлашып", суроолорума "жооп" алгандай болуп каниет алып калдым эле.
"Аялзаттын паашасы Каныкей энебиз кандай жан болду экен, Саякбайга кантип жолукту экен, Баатырлар кантип колдошту экен, дегеле Саякбай кантип Манас айтып калды экен" деген суроолорума белгилүү режиссер Эрнест Абдыжапаров жооп алып берди. Кыргызды кемитпей, суусун түгөтпөй тамырын сактап келген эрендердин караанын көрсөм деген эңсөөмдү басты.
Тасманын режиссеру Эрнест Абдыжапаровго, Саякбай Каралаевдин ролун ойногон Үмөт Болот уулу менен Марат Жантелиевге, Бейшекан апанын образын жараткан Тынара Абдразаевага, Чыңгыз Айтматовду ойногон Элдар Айтматовго, тасмага музыка жазып берген Муратбек Бегалиевге, ушул кереметтин жаралышына огожо болгон Самат Ибраевге, бардык чыгармачыл топко терең ыраазычылык.
Бар бол, кыргыз элим! Ар бир үйдө комуз чертилип, Манас айтылсын, жигиттерибиздин башынан ак калпагы түшпөсүн!
