Баткен: Өзбекстанга көз карандысыз жолдун курулушу акча жоктугунан токтоп турат

БИШКЕК, 5-сен. — Sputnik. Баткен облусунда коңшу Өзбекстанга көз карандысыз Бел-Бөжөй-Сөгөттү жолунун курулуш иштери каражат жоктугунан улам токтоп турат. Бул тууралуу Ош-Баткен-Исфана автожолдор башкармалыгынын башчысы Ашым Усенов Sputnik Кыргызстан агенттигине билдирди.

Эске сала кетсек, Баткен районунун Бөжөй айылынын тургундары облус борборуна жана Кадамжай районуна баруу үчүн Өзбекстандын Сох анклавы аркылуу өтүп келишкен. 2013-жылдын январь айында чек арада чыккан чыр-чатактан кийин өзбек тарап жолду жаап, үч айдан соң кайра ачкан.

Усеновдун айтымында, аталган жолдун жалпы сметалык баасы 187 миллион сомду түзөт. Шагыл төшөө иштерине республикалык казынадан 85 миллион сом бөлүп берилген.

"Бел-Сөгөт-Бөжөй жолунун курулуш иштери 2017-жылдын январь айында башталган. Сегиз ай ичинде 13 чакырым жолго шагыл төгүлүп, ал эми асфальттоо каражат жоктугунан улам токтоп калган. Жол жээгине суу өткөрүүчү түтүктөр да орнотулушу керек. Республикалык бюджеттен акча бөлүнсө курулуш иштери улантылат", — деди ал.

Учурда Бөжөй айылынын жашоочулары облустун башка аймактарына шагыл жол аркылуу каттап жатышат.