Форумдун алкагында Бишкек декларациясы кабыл алынды.
Саммиттин катышуучуларынын алдында өлкө президенти Алмазбек Атамбаев сөз сүйлөдү. Ал жаңы өкмөт Кыргызстанды 2040-жылга чейин өнүктүрүү стратегиясына ак илбирстин эко-системасын сактоо долбоорун киргизиши керектигин билдирди.
"Жакында дайындала турган өкмөт башчыга кайрылгым келет. Учурда 2040-жылга чейинки өнүгүү стратегиясы иштелип жатат. 40-жылы Улуу Кыргыз Каганатынын 1200 жылдыгы майрамдалат. Кыргыз каганатынын биринчи башчысынын аты Барсбек болгону да жакшы белги. Буга байланыштуу программага ак илбирстин эко-системасын киргизүү туура болот. Биздин урпактар ак илбирсти музейден гана көрүп калбашы керек", — деди Атамбаев.
Ошондой эле мамлекет башчы форумдун катышуучуларын Глобалдык экологиялык фонд колдой турган ак илбирсти сактоо боюнча өлкөлөр аралык мультидолбоорду ишке ашырууга чакырды.
