БИШКЕК, 14-авг. — Sputnik. Эл аралык сулуулук сынагына Кыргызстандан барган кыз башка өлкөнүн атынан чыга коюп бир чуу салса, кең жайытта бийлеген жигит интернетти дүң кылды.
Sputnik Кыргызстан агенттиги артта калган аптада социалдык тармактарда чуу жараткан жана көңүл көкөлөткөн окуялар топтомун сунуштайт.
1. Жайлоодогу жигиттин бийи. Бул байке жайлоодо эмес, тойдо да чыгыш бийин бийлегенде кыздарды жөн эле уят кылмак.
2. Ханбийкенин ханга арнаган видеоролиги. Ажо Алмазбек Атамбаевдин кызы Алия Шагиева Facebook баракчасына жүктөгөн видеосунда атасына болгон сүйүүсүн айтып, ага ыраазычылык билдирди.
3. Алыстан чуу салган сулуу. World Next Top Model — 2017 сулуулук сынагына Кыргызстандын атынан барган Сусанна Егорян финалда Армениянын аты жазылган лента менен чыккан. Муну кыргызстандыктар кыжырдануу менен кабыл алып жемелегендер четтен чыкты. Өз кезегинде Егорян да өздүк баракчасы аркылуу жооп кайтарган.
4. Монголиянын кол башчысын таң калтырган сүрөтчү. Ошол эле учурда кыргызстандык Азамат Жаналиев Монголиянын жаңы шайланган президенти Халтмаагийн Баттулга менен жолугуп, ага мык жана жип (стринг-арт) менен тартылган сүрөтүн белек кылды. Муну көргөн кыргызстандыктардын чекеси жылып кубанып калышты.
5. Оштук Витастын кубулжуган үнү. Жаш бала шаардагы көчө караокелеринин биринде орус ырчысы Витастын "Опера №2" аттуу ырын ырдап социалдык тармактын жылдызына айланды. Талантың ташкындай берсин!
6. Көчө шыпырган аялды кубанткан мырза. Анда бейтааныш мырза көчө шыпырып жүргөн аялга роза менен балмуздак калтырып кеткен. Ал бул сүрөттү "Тазалык" муниципиалдык ишканасынын Facebook баракчасына кубануу менен бөлүштү.
7. Сүрөткө түшкөндү үйрөнүңүз. Жүз жолу сүрөткө түшүп арасынан бирди тандап отуруп калбай бул жигиттен сүрөткө түшкөндү үйрөнүп алыңыз.
