БИШКЕК, 14-авг. — Sputnik. Өкмөт башчы Сооронбай Жээнбеков Астана шаарында Россиянын премьер-министри Дмитрий Медведев менен жолугушту. Бул тууралуу өкмөттүн маалымат кызматы билдирди.
Өкмөт башчылардын жолугушуусу Казакстанда өтүп жаткан Евразия экономикалык биримдигинин өкмөттөр аралык кеңешинин кезектеги жыйынынын алкагында болду.
"Мигранттарга улуттук айдоочулук күбөлүк менен иштөөсүнө уруксат берүүңүздөр эки өлкөнүн мамилесин жакшыртууга багытталды. Учурдагы жакшы жагдайды эске алуу менен, эки өлкөнүн товар айлантуусунун көлөмүн көбөйтүүбүз керек", — деди Жээнбеков.
Жолугушууда Медведев эки тараптуу мамилелер маанилүү экендигине токтолду.
"Акыркы убактарда Кыргызстанда өндүрүлгөн жаңы продукциялардын арты менен эки тараптуу товар алмашуунун көлөмү көбөйдү. Бул көңүл жакшы жагдайды сактап, өнүктүрүшүбүз керек", — деди Медведев.
Эске сала кетсек, ушул күндөрү Астана шаарында Евразия экономикалык биримдигинин өкмөттөр аралык кеңешинин кезектеги жыйыны өтүүдө.
