БИШКЕК, 11-авг. — Sputnik. Тогуз-Торо районунда жайгашкан ачык асман алдындагы галерея — Саймалуу Таш коругунда биринчи жолу багыттуу түрдө Манас айтылды. Иш-чара "Жибек Жолундагы ак конуш" долбоорунун алкагында уюштурулганын Sputnik Кыргызстан агенттигине аталган долбоордун жетекчиси Гүлжан Иреш айтып берди.
Гүлжан Ирештин айтымында, Чыгыш өлкөлөрүндө өтө турган иш-чараларда негизги басым манасчыларга коюлат. Мындан улам аталган иш-чара дүйнөдө теңдеши жок эпос "Манасты" чыгыш элдерине угузуу, жайылтуу, ал аркылуу касиеттүү манасчылык өнөрдүн өзгөчөлүгүн таанытуу максатын көздөдү.
"Мына ушул чоң сапардын алдында 11 адамдан турган топ деңиз деңгээлинен 3168 метр бийиктикте жайгашкан Саймалуу-Ташка чыгып, ата-бабалардын урпактарга калтырып кеткен сырдуу белги таштарына, касиеттүү жерине таазим этүү менен бирге түлөө өткөрүп кайтышты. Мында белгилүү манасчылар Камил Мамадалиев, Нурбек Талантбеков, Кутман Борончу уулу манас айтышты", — деди долбоордун жетекчиси.
Сапар тууралуу Гүлжан Ирештин даректүү тасмасы жакын арада көпчүлүктүн назарына сунушталат.
