БИШКЕК, 28-июл. — Sputnik. Өзбекстандын тунгуч президентинин кызы Гүлнара Каримовага Кылмыш жаза кодексинин бир нече беренелери боюнча күнөө тагылды. Бул тууралуу Sputnik Өзбекстан жазып чыкты.
Анын уюшкан кылмыштуу топтор менен иш алып барганын Өзбекстандын прокуратурасы аныктаганы маалым болду.
Ага ылайык, Гүлнара Каримова 2001-2013-жылдар аралыгында кылмыштуу топтор менен биргеликте бир катар кылмыштарга барган. Ал ишкерлерге кысым көрсөтүү менен жалпы суммасы 54,1 миллиард сумга жеткен каражат тапкан.
"Гүлнара Каримовага Өзбекстандын Кылмыш кодексинин 168, 178, 182, 189, 288 жана 243-беренелери боюнча кылмыш иши козголуп, убактылуу кармоочу жайга киргизилди", — деп айтылат маалыматта.
Тунгуч президенттин кызы ишканалары үчүн 3 триллион сум салык төлөбөгөн деп айыпталууда.
