БИШКЕК, 27-июл. — Sputnik. Ысык-Көл облусунун Чолпон-Ата шаарындагы ат майданга киргендерден 50 сом өлчөмүндө акы алуу тууралуу буйрук 3-июлда кабыл алынганын Этномаданиятты, ат спорту индустриясын жана таза кандуу жылкы чарбасын өнүктүрүү борборунун жетекчиси Эламан Мамытов Sputnik Кыргызстан агенттигине билдирди.
Мамытов чогулган каражат ат майдандын ары-бери жагын оңдоп-түздөөгө кетерин айтып, ипподром мамлекеттен бир сом акча албагандыктан кеткен чыгымдардын бардыгын өздөрү каржылашарын айтты.
Андан сырткары, берилген ар бир талон каттоого алынып, бардыгы кассага түшөрүн баса белгиледи.
"Ипподромду кармап туруу дагы кымбат болууда. Айына 700-800 миң сомго чейин чыгып жатат. Анын ичинде жумушчулардын айлыгы, электр энергиясы, суу, салык сыяктуу чыгымдар бар. Кышында миллион сомго чейин жетип кетти. Себеби, имараттын ичи көгөрүп кетпесин деп жылытып жаттык", — деди Мамытов.
Ал өз сөзүндө ипподромго келген эл имараттын айланасын булгап, арак ичип, шишелерин ыргытып кеткен учурлар болгонун белгиледи.
"Башында бул жерге келип алып, ырдап-бийлеп кеткендер болду. Аларды "кеткиле" деп катуу айта албайт экенсиң. Акы алына баштагандан тарта жөн эле келе бергендердин саны азайды. Акы алуу 3-сентябрга чейин уланат", — деди ал.
Мамытов мындай акы алуу аракети кийинки жылы жай айында да болорун кошумчалады.
Кабыл алынган буйрукка ылайык, ипподромго кирүү 7 жашка чейинкилер үчүн бекер, андан жогоркулар үчүн 50 сом деп бекитилген.
