БИШКЕК, 24-июл. — Sputnik. Президент Алмазбек Атамбаев Чолпон-Атада өтүп жаткан маалымат жыйынында Чыныбай Турсунбековдун президенттик дымагы тууралуу суроого жооп берип жатып "партиянын курултайынын чечими менен макул болбогон киши андан чыгышы керек" деген жооптуу берди.
15-июлда КСДП партиясынын съезди өтүп анда аймактардан келген делегаттар бир добуштан азыркы премьер Сооронбай Жээнбековдун талапкерлигин бир добуштан колдошкон. Курултайда Жогорку Кеңештин төрагасы Чыныбай Турсунбеков дагы президенттикке аттануу боюнча ою бар экенин кыйытып айткан.
"Чыныбай Акунович көпкө иштеди, фракциянын жакшы лидери болду. Жаңылбаган жаак, мүдүрүлбөгөн туяк болбойт. КСДП президенттикке талапкер издеп, менден кеңеш сураганда социалдык сурамжылоо жүргүзүүнү сунуштагам. Анын жыйынтыгы боюнча Сооронбай Жээнбеков алдыга чыгып, Сапар Исаков экинчи болгон. Эгерде киши партиянын курултайы менен макул болбосо, уставга ылайык, партиядан чыгышы керек", — деди Атамбаев.
Турсунбеков президенттик шайлоого аттануу боюнча өз арызын Борбордук шайлоо комиссиясына тапшыра элек.
Белгилей кетсек, Кыргызстанда президенттик шайлоо 15-октябрда өтөт.
