БИШКЕК, 19-июл. — Sputnik. Премьер-министр Сооронбай Жээнбеков Бишкек — Ош автожолунун башкы директору Изатбек Токтомамбетов өз милдеттерин аткарбагандыгы, өкмөттүн тапшырмасын жана ремонт ишинин графигин үзгүлтүккө учураткандыгы үчүн кызматынан аларын айтты. Бул тууралуу өкмөттүн маалымат кызматы билдирди.
Жээнбеков трасса менен таанышкандан кийин Транспорт жана жолдор министрлигине караштуу Бишкек — Ош автожолу мамлекеттик дирекциясынын ишин мурда аныкталган ремонт мөөнөтүн үзгүлтүккө учураткандыгы үчүн катуу сынга алды.
Премьер-министр эскерткендей, мурунку жолу автожолдун аталган тилкесин иликтөө учурунда ремонт иштери 2017-жылдын 30-майында башталары тууралуу маалымат берилген.
"Көрсө ремонт иштери жакында гана башталыптыр. Калк тарабынан Бишкек — Ош автожолунун начар абалы боюнча тынымсыз даттануулар келип түшүүдө. Күн сайын аталган магистралдан 2 миңге жакын унаа каттайт. Ремонт башталган 45 күндөн бери болгону 2,5 чакырым жол оңдолгонуна ишенүү кыйын. Эгерде аба ырайы күндүзү ишти жүргүзүүгө тоскоолдук кылса, анда түндө иштеш керек. Акча маалында берилип жатат, көйгөй жок, бардык зарыл техника берилген. Айрым аткаруучулардын кайдыгер мамилеси жана кесипкөй эместигинен өкмөткө айып тагылууда", — деди Жээнбеков.
Транспорт жана жолдор министри Жамшитбек Калилов азыркы учурда 2,5 чакырым аралыкка асфальт төшөлгөнүн айтты. План боюнча жалпысынан 12 чакырым аралыкка төшөлөт. Бул максатта 98 миллион сом бөлүнгөн.
Жээнбеков Транспорт жана жолдор министрлигине 2017-жылдын 15-августуна чейин автожолдун аталган тилкесин оңдоп бүтүрүүнү тапшырды. Эгерде берилген тапшырма аткарылбаса, жооптуу жетекчилер жазаланарын эскертти.
