БИШКЕК, 19-июл. — Sputnik. Улуттук коопсуздук мамлекеттик комитети террордук аракеттерди жасоого камынып жаткан 37 жаштагы жаранды Ош облусунун Кара-Суу районунда 4-июлда кармады. Бул тууралуу мекеменин маалымат кызматы билдирди.
Ага ылайык, колго түшкөн жаран Сирия менен Ирактагы куралдуу салгылаштарга катышкан. Андан сырткары жардырууларды ишке ашыруу боюнча атайын даярдыктан өтүп, Кыргызстандын аймагында жардыруу уюштурууну пландаган.
"Анын жашаган жерин тинтүү учурунда колго жасалган 8 килограмм жарылуучу зат табылган. Ошондой эле экстремисттик мүнөздөгү адабияттар алынган", — деп айтылат.
Табылган жарылуучу зат УКМКнын саперлору тарабынан жеринде жок кылынган.
Учурда аталган факты боюнча кылмыш иши козголуп, кармалган жаран УКМКнын убактылуу кармоо жайына киргизилди. Тергөө амалдары жүрүүдө.
