Кыргызстанда биринчи жолу кыргызча сүйлөгөн Касым жана Арууке аттуу куурчактар жасалды. Бул тууралуу Sputnik Кыргызстан агенттигине идеянын автору Канат Жаныбеков билдирди.
Анын айтымында, куурчактарды жасоо идеясы мындан беш жыл мурун эле келген.
"Балам Касым менен кызым Арууке "Керемет көч" тасмасындагы Актан менен Акылайдын оюнчуктарын сураганынан сатып алалы деп эч жерден таппай койдук. Анан келинчегим экөөбүз тең кол өнөрчү болгондуктан балдарга өз колубуз менен оюнчук жасап бердик. Кийинчерээк бул ишибизди хоббиге айлантып, атайын үн студиялары, сүрөтчүлөр менен иштешип, аларды балдарга пайдалуу болуш үчүн кыргызча сүйлөтүп койдук. Анткени казактардын же орустардын өз тилинде сүйлөгөн куурчактары бар. Бала кичинекей кезинде бат эле бир нерсени кабыл алгандыктан кыргыз тилинде сүйлөгөн оюнчуктар балдарыбызга абдан керек деп ойлодук", — деди Жаныбеков.
Улуттук стилде колго жасалган оюнчуктар жакында борбор калаадагы дүкөндөрдө сатыла баштайт.
