Мындай шырдакты жеке ишкер боз үй формасында курулган улуттук стилдеги конок үйүнүн ичин жасалгалоого атайын буюртма берип жасаткан. Бул туурасында Sputnik Кыргызстан агенттигине "Чебер колдор" коомдук бирикмесинин жетекчиси Тоюмбүбү Аманова билдирди.
"Элеттик аялдар өзүбүзчө бирикме түзүп 2000-жалдан бери ала кийиз, шырдак жана кийиз буюмдарын жасап иштеп келе жатабыз. Курамыбызда 15 аял бар. Алардын ичинен үчөө ЮНЕСКОнун "Сапат" белгиси бар сертификатка ээ. Бул шырдакты эки айда жасап бүттүк. Негизи шырдактын бир чарчы метри 4000 сом турат. Бул шырдактын диаметри 10, көлөмү 75 чарчы метр болгондуктан ар бир чарчы метрин 3500 сомдон жасап бердик", — деди Аманова.
Белгилей кетсек, Нарындын Ат-Башы районунда 28-29 июнда салтка айланып калган кыргыз шырдагынын VII фестивалы өтөт. Иш-чаранын максаты кыргыз элинин кол өнөрчүлүгү боюнча мурастарын, кийиз жасоо өнөрүн сактап калуу, уздарды колдоо, ошону менен бирге аймактын экономикалык абалын жакшыртуу, туристтерди тартуу болуп саналат.
