Океандын ары жагында Кыргызстандын желегин желбиреткен спортчу менен кабарчыбыз маек курду.
— АКШда канча убакыттан бери машыгасыз жана бул жакка кантип келип калдыңыз?
— Бир жыл тогуз ай болуп калды. Бул жакка атайын чакыруунун негизинде Россиядан келгем. Анан алты ай жүрүп, кийин келишим түздүк. Азыр Пенсильвания штатынын Филадельфия шаарындагы Diesel Fit Boxing клубунда машыгып жатам.
— Алгач Кыргызстанда анан Россияда, мына эми АКШда машыгып беттештерге катышуудасыз. Кандай кыйынчылыктар бар экен?
— Он эки жашымдан бери бокс менен машыгам. Буга чейин Москвада спорт сүйүүчүлөр арасында күч сынашып, Россиянын атынан эл аралык мелдештерге чыгып жүргөм. Анткени 16 жашымдан бери ал жакта жашап, билим алгам. Америкага келгенден кийин профессионалдар арасында рингге чыга баштадым. Оңой эмес экен, бул жерге келгенде ар кандай кырдаалдарга даяр болуу керек экендигин сездим. Анан биздикиндей эптеп-септеп иш бүтүргөн жарабайт. Бул жерде спортко олуттуу мамиле жасалат. Алсак уйку, тамактануу өз маалында болушу шарт, машыгууда талаптар күчтүү.
— Келгенден бери канча беттеш өткөрдүңүз?
— Атаандаштык күчтүү бекен?
— Менин оюнча Америкада ар бир үчүнчү эркек бокс менен машыгат. Ошондой эле бул жакта сүйүүчүлөр арасындагыларга караганда профессионалдык бокс жакшы бааланат. Аны менен кошо атаандыштык да күчтүү. Менин келишимим үч жылга түзүлгөн, азыр бир жыл үч айы соңуна чыгып калды. Буюрса, эки беттеш өткөргөндөн кийин профессионалдар арасындагы рейтингдеги ордум белгилүү болот.
— Ал жакта спорт боюнча үйрөнө турган учурлар көп бекен?
— Америкалыктар бокс боюнча бир топ алдыга кетиптир. Атайын машыгуу үчүн Европа, Азия өлкөлөрүнөн Куба, Коста-Рикадан көп спортчулар келет. Алар спортчунун жаш курагына дагы анча маани бербейт экен. Мисалы, биздин шаарда 48 жаштагы чемпион бар. Бул жакта чогуу машыккандар 25 жаштамын десем "baby" деп тамашалап коюшат. Анткени 40-45 жашка чейин машыгып рингге чыгып жүргөндөр арбын.
— АКШда жашоо кандай, анан туулган жерди сагынган чыгарсыз?
— Үйлөнгөнүмө тогуз ай болду. Учурда перзент күтүп жаткан учурубуз. Кыргызстанды аябай сагынам, көздөн учат. Өзгөчө тамагын аябай сагынып шаарлардан биздин ашканаларды издейбиз.
— Спорттон сырткары эмне менен алектенесиз?
— Негизинен убакыт машыгууга кетет. Кол бошогондо такси айдап же башка майда-чүйдө жумуштарга иштейм. Анан сөзсүз, үй-бүлөгө убакыт бөлүп, англис тилин үйрөнмөй.
— Келишим аяктагандан кийин эмне кыласыздар?
— Азыр чемпион болгонго бардык аракеттерди жумшап жатабыз. Ошондой эле билим жана тажрыйба алып, балдарды Кыргызстанда машыктырсам деп жүрөм. Бир жарым жыл калды, эми убактылуу чемпиондук кур үчүн беттешем. Андан кийин Лос-Анжелес шаарындагы промоушн компания менен келишим түзсөм деп жүрөм. Ал жакта белгилүү боксчу Мэнни Пакьяо машыгат.
