БИШКЕК, 15-июн. — Sputnik. Бүгүн Мамлекеттик каттоо кызматынын жетекчиси Тайырбек Сарпашев ээлеген кызматынан бошотулду. Ага улай мекеменин маалымат кызматы экс-төраганын билдирүүсүн таратты.
Эскерте кетсек, Сарпашев премьер-министр Сооронбай Жээнбековдун "жазылган арызын канааттандырып, өз ыктыяры менен" жумушунан бошоткон.
Ал эми 12-июнь күнү Улуттук коопсуздук боюнча мамелкеттик комитет Сарпашевге козголгон иштен кылмыш элементтерин таппагандыктан, тергөөнү токтоткон.
Экс-төрага иш негизсиз козголгонун билдирген.
"Кеп менин вице-премьерлик кезимдеги, 2013-жылдагы окуялар тууралуу болууда. Кудайга шүгүр, тергөөчүлөр ишти иликтеп, чындык менен акыйкаттыкты табышты. Мага карата козголгон башка иш боюнча да күнөөм жок экенине ишенем. Ушунчалык ыпластыкка түртүп жаткандыктарын көрүп, ушу кезге чейин шок абалындамын", — деди Сарпашев.
Ал айрым эксперттер башынан эле Сарпашевдин атын өзүнүн ыплас схемаларына аралаштырууга кызыкдар адамдар бар экенин айтышканын белгиледи.
"Мени жаманатты кылуу аракети болушу мүмкүн. Буга чейин кетирген кемчиликтерим тууралуу көп ойлондум, бирок эч качан мыйзам бузган эмесмин. Аркалаган кызматым жана өзүмдүн кадыр-баркым мен үчүн жөн эле сөз эмес", — деди Сарпашев.
Белгилей кетсек, Башкы прокуратура Мамлекеттик каттоо кызматынын жетекчиси Тайырбек Сарпашевди Максим Бакиевдин ишенимдүү адамы Ульяна Пакка тиешелүү кыймылсыз мүлктү камактан чыгарууга буйрук берген деп айыптап, аны кызмат ордунан алуу боюнча өкмөт башчыга сунуш жөнөткөн.
Мындан тышкары, ал кызматтык абалынан кыянаттык менен пайдаланган деп айыпталууда. Башкы прокуратуранын маалыматы боюнча 2013-жылдын 28-мартында Каттоо кызматы жарандык абалды күбөлөндүргөн бланкаларды сатып алууга тендер жарыялаган. Сынакка эки компания катышып, Сарпашев жеңилип калган ишкананын бланкаларын сатып алууга буйрук берген делүүдө.
Тайырбек Сарпашев Мамлекеттик каттоо кызматын 2015-жылдын ноябрь айынан бери жетектеп келген. Ага чейин биринчи вице-премьерликти аркалаган.
