Ошентип, бүгүн 12-июнь. Жайдын алгачкы айы капортолоп калды. Элдин көбү эс алууга чыгып, көбү көлдү көздөй карап турган чагы. Анткен менен күндүн табы жакшы көтөрүлбөй жаткандай. Синоптиктер бүгүн өлкө аймагы боюнча ала булут каптаганы менен Бишкек менен Ошто күн 34 градуска чейин ысый тургандыгын билдиришти. Эс алууга күн жолтоо болбойт өңдүү.
Эгерде эмгек өргүүсүн алып, Франция жакка жол түшүп калса, ал жактагы Диснейлендден караколдук мекендешибиз Сухрабды жолуктуруп калышыңыз ажеп эмес. Тырмышып, тырышып окуп, иштеп жүргөн ал жигит сизди көрсө, сөзсүз кубанат. Ал азыр ресторанда эмгектенип жатыптыр.
Ал эми Бишкектеги тез татым, тагыраагы фастфуддан шам-шум этем десеңиз, алды алар менен айтыша көрбөңүз. Сизди шапылдап тейлеген жигиттердин бири төмөнкүлөрдү айтып бериптир… Этиң адалбы деп эле сурасаңыз, балээге калчудайсыз.
Уй баласы — саан уй менен кунаажындарды идентификациялоо аягына чыгыптыр, эми өгүз жана букалар каттоого алынат экен. Андагы маалыматта эмделгени, эмделбегени, ылаңы бар-жогу айтор, майда-чүйдөсүнө чейин жазылат экен. Балким ушул иш жөнгө салынып кетсе, күмөн санабай эт жеп калаарбыз. Айылдагылар ошентип билек түрө мал санакка даярданып жатат экен.
Айыл демекчи, сайтыбызда балалыкты эстеткен сонун бир эскерүү бар. Бул сапар "Айылга катты" экс-депутат Ыргал Кадыралиева жазды. Элдин көзүнчө чоң апасынын карызын кечип, кээде кантип "акмак да болуп каларын", дагы-дагы көп жылуу ирмемдери эстептир.
Жылуу ирмем демекчи, кадимки эле Жеки Чандын казак бөбөктүн тушоосун кесип жатып, баланын бетинен мээрим, жакшы көрүү менен сүйгөнү видеого түшүп калыптыр. Көкүрөккө күн кечке жылуулук тартуулай турган ирмем болуптур.
Атактуулардын жөнөкөйлүгүнө суктанып жылмайып бүтө электе, береги аялдын окуясы "ой" дедирди. Телефон тиктеп келе жатып, эки метр чуңкурга түшүп кетиптир…
Валюта наркы. Сомдун баасы долларга карата орто эсеп менен 68.29 (сатып алуу) жана 68.54 (сатуу) сомду түздү.
Мунай баасы. Бишкекте орточо эсеп менен алганда Аи-92 үлгүсүндөгү май 38.30 сом, Аи-95 үлгүсүндөгү бензин 41.20 сом, ал эми дизель майы 36.00 сомдон сатылууда.
Соңку сөз. Бекер ичкен бей таалай, таап ичкен чоң таалай.
Аптабыз бейкут өтүп, жакшы маанайларды тартууласын. Эс алууга аттангандарга ак жол каалап, Нургүл Максутова
