БИШКЕК, 2-июн. — Sputnik. Кыргызстандагы катталып жаткан жол кырсыктарынын көбүн тажрыйбалуу айдоочулар жаратат. Бул тууралуу Автомектеп жана машина ээлери ассоциациясынын вице-президенти Жылдыз Мурзабекова Sputnik Кыргызстан агенттигинин мультимедиалык борборунда болгон маалымат жыйында билдирди.
Эскерте кетсек, 11-майда Билим берүү министрлигинин текшерүүсүнүн жыйынтыгында Кыргызстандагы 205 автомектептин 102синен мыйзамсыз аракеттерди аныктап, аларга эскертүү берген.
"Жол кырсыктарына автомектепти жаңы бүткөндөр эмес, тажрыйбасы 10, 20 жылдан ашкан айдоочулар себепчи болот. Мисалы, Бишкек — Алматы каттамы боюнча жүргүнчү ташыган айдоочулар Чүй облусунун аймагында жол эрежесин көп бузушат да, Казакстандын аймагына киргенде дароо үлгүлүү айдоочу болуп калышат", — деди Мурзабекова.
"Жөө адамдар жолду туура эмес жерден кесип өтүшөт. Кишилер өтө турчу чийинден өтүп жатканда эки жагын карап, машинанын бар-жогун байкап, эгер болсо айдоочу машинаны токтотконго жетишеби же жокпу, ойлош керек. Бул жол кыймылынын эң жөнөкөй гана эрежеси", — деди ал.
Мурзабекова жол кырсыгына байланышкан көйгөйдү мыйзамдын деңгээлинде чечүү керектигин айтып, жарандык коом менен мамлекеттик органдарда тийиштүү иштерди жүргүзүү керектигин айтты.
