БИШКЕК, 28-май — Sputnik. Москвада иштеген 20 жаштагы кыргыз кыз белгисиз адамдар тарабынан барымтага алынганын айтып, зөөкүрлөр бир миллион рубль талап кылып жатканын бир тууган эжесине социалдык тармактагы баракчасы аркылуу жазып жиберген. Бул тууралуу КР ИИМдин Россиядагы өкүлү Аскат Алиев Sputnik Кыргызстан агенттигине билдирди.
Анын айтымына караганда, кыздын барымтага алынышы боюнча кабар аларга 26-майда келип түшкөн.
Бул тууралуу маалымат Москва шаарынын Кылмыш иликтөө башкармалыгына берилип, териштирүү иштери башталган.
"27-майда уурдалды делген кыздын жүргөн жери аныкталып, жагдай башкача болуп чыкты. Көрсө 20 жаштагы мекендешибиз эжесинен акча алуу үчүн окуяны оюнан чыгарып, баарыбызды убара кылыптыр. 20 жылдык ишимде мындай окуяга биринчи жолу күбө болдум", — деди Алиев.
Анын айтымында, токтогулдук кыз Москва шаарында бала карап иштейт. Мындай кадамга барууга эмне себеп болду деген суроого жер тиктеп жооп берген эмес. Окуянын чоо-жайы аныкталгандан кийин кыз үйүнө коё берилген.
