БИШКЕК, 23-май — Sputnik. Ысык-Көл облусунун мал чарбачылыгын өнүктүрүүгө 5 миллион доллар тартылат. Бул тууралуу Айыл чарба, тамак-аш өнөр жайы жана мелиорация министрлигинен кабарлашты.
Билдирүүгө ылайык, Айыл чарба министрлиги Бүткүл дүйнөлүк банктан 5 миллион доллар каражат алат. Анын 2 миллион 250 миң доллары гранттык негизде болсо, калганы 38 жылга 0,75 пайыздык үстөк менен алынат.
Насыя алуу маселеси учурда Жогорку Кеңештин тармактык комитеттеринде каралууда.
Өкмөт менен Бүткүл дүйнөлүк банктын ортосундагы келишимдин негизинде бериле турган каражаттар малды идентификациялоого, сүт продукцияларын өндүрүүнүн көлөмүн көбөйтүүгө жана фермерлерди колдоо иштерине жумшалат. Долбоор ишке ашса, Ысык-Көлдө өндүрүлгөн сүт азыктарынын көлөмү 15 пайызга чейин жогорулайт.
