3-майдан тарта улам-улам кайталанган жер титирөөнүн кесепетинен Чоң-Алай районуна караштуу Кара-Тейит, Кара-Мык, Жекенди жана Шибээ айылдары жабыркаган.
Өзгөчө кырдаалдар министринин орун басары Равшанбек Рысбаев акыркы кезде Чоң-Алай районунда түрдүү магнитудадагы 16 жер титирөө катталган болсо, анын 8и төрт баллдан жогору болгонун айткан жайы бар.
ӨКМ үйүнө зыян келгендер чатыр, боз үйлөргө көчүрүлүп, анда жалпысынан 3000ге чукул киши жашап жаткандыгын айткан.
Жекенди айылынын тургуну Анипа Сүйүндүкова кечкисин чатырларда жашаган эл үшүп калгандыгын айтып берди.
"Тоолордо кар жаткандыктан, түнкүсүн боз үй менен чатырларда кадимкидей эле суук болуп жатат. Мен баатыр энемин, неберелерим жана балдарым менен бир үйдө эптеп батып жашап жатабыз", — деди ал.
Ал эми Жекенди айыл өкмөтүнүн башчысы Нургазы Акматов жер кайра-кайра силкингендиктен, жабырланган үйлөрдүн саны улам көбөйүп жаткандыгын кошумчалады.
