БИШКЕК, 10-май. — Sputnik. Мындан бир апта мурда болгон жер титирөөнүн кесепетинен жабырланган чоң-алайлыктар чатыр менен боз үйлөргө жайгаштырылган. Алар азыркы абалы туурасында өздөрү айтып беришти.
Ош облусунун Чоң-Алай районундагы Жекенди айыл өкмөтүнө караштуу айылдарда жалпысынан 523 үй жашоого кооптуу деп табылган.
3-май күнү аталган аймакта катталган жер титирөөдөн соң Карамык, Кара-Тейит, Шибээ, Жекенди айылдарында жалпы 993 үйдү атайын түзүлгөн алты топ иликтөөгө алган. Жыйынтыгында жер титирөөнүн кесепетинен улам IV жана V категорияга кирген 523 үй аныкталып, жашоого кооптуу деп табылган.
Мындан сырткары, Шибээ айылындагы орто мектептин жана Карамык айылында оорукана менен айыл өкмөттүн имараты да авариялык абалга келген. Бул тууралуу Чоң- Алай районундагы Жекенди айыл өкмөтүнүн башчысы Нургазы Акматов аймактык кабарчыга билдирди.
Учурда аталган аймактын жашоочуларына 550 даана чатыр таратылган. Алардын бир катарлары боз үйлөрдө жашап жатышат.
Жапа чектирген жаракалар
Кара Тейит айылынын жашоочусу Суусар Насирдинова үйүнүн дубалы артка чалкалап төрт тарабынан тең жарака кеткендигин айтат.
"Жер титирөө 3-майда башталган. Дагы деле токтобой жатат. 1978-жылы да катуу жер титирөө болгон эле. Бирок, бул жолу андан да катуу титиреди. Биринчи күнү жер титирөө өтө катуу болду. Чайнектер шкафтан жерге ыргып түшүптүр. Эми мындан аркы жашообуз кандай болот? Билбейбиз. Мындай катуу кырсыкты күткөн жок элек. Там салууга каражатыбыз жок", — дейт ал.
Ал турак жай курууга каражаты жок экендигин, үйүн болсо камсыздандыра электигин билдирди.
"Саат 10:47 болчу. Мен сырттан үйгө кирдим эле. Кайненемдин тырмагын алып берейин деп жаткам. Сырттан дүркүрөгөн дабыш угулду. Телевизордун астындагы тумбочка үстүмө кулап түштү. Андан аркысы эсимде жок. Өзүмө келсем, сыртка бакка алып чыгып бетиме суу чачып жатышыптыр. Буга чейин да 1999-жылы биздин айылга бомба түшкөндө нерв системаларым жабыркаган. Бул жолу да катуу чочуп, ооруп калдым", — дейт Кара-Тейит айылынын жашоочусу Сайрагүл Асанбаева.
Ушул эле аймактын жашоочусу Зуур Амирбеков жер титирөөнүн кесепетинен алты бөлмөлүү үйүнөн ажыраган.
"Айылдагы эң чоң үйлөрдүн бири эле. Кырсыктын айынан ушундай оор абалда калдык. Учурда чатырда жашаганга аргасызбыз", — дейт ал.
Аталган айылдын жашоочулары 3-майдан бери жер титирөө токтой электигин баса белгилешти. Аба ырайы катаал аймак болгондуктан жашоочулар чатырларда түнөп, түнкүсүн суук болгондуктан үшүп жаткандыктарын айтышат.
Дарыгер: кырсыктан кийин ооруп калгандар кескин көбөйдү
"Ош шаарынан психологдор келишкен. Алардан сырткары невропатолог, кардиолог адистери да тартылган. 3-май жер титирөө катталган күнү 350 жаран кайрылды. Андан кийин күн сайын 300-400гө чейин жарандар кайрылып жатат. Аларга алгачкы медициналык жардам көрсөтүп жатабыз. Дары дармектер жетиштүү. Кайрылгандардын арасында жер титирөөдөн чочуп уктабай, ооруп калган жаш балдар да бар", — дейт Абдымалик Мамасейит уулу.
