БИШКЕК, 4-май. — Sputnik. Ош шаарында 630 орундуу мектеп курулуп, аны Өзбекстан мамлекети каржылай турган болду. Бул тууралуу Ош шаарынын мэриясынан кабарлашты.
Маалыматка карганда, мындай иштер кыргыз-өзбек мамилелерин чыңдоо максатында жүргүзүлүп жатат.
"Ош шаарынын мэриясы калаанын борбордук көчөлөрүнүн биринен мектеп үчүн 1,11 гектар жер бөлүп берди. Долбоорго ылайык курулуштун жалпы аянты 3851 чарчы метрди түздү. Мындай иштер эки мамлекеттин биримдигин чыңдоого өбөлгө болот", — деп мэр Айтмамат Кадырбаев билдирген.
Долбоордук документтер боюнча мектепте спорт, эмгек, медициналык залдар жана ашкана сыяктуу керектүү шарттардын бардыгы түзүлмөкчү. Ошондой эле үч кабаттуу имаратта лабораториялар дагы камтылат. Курулуш иштери жакын арада башталат.
