БИШКЕК, 4-май — Sputnik. Улуу Ата Мекендик согушта дайынсыз жоголгон Меңдеш Өмүралиевдин Советтер Союзунун баатыры ордени анын бир тууганынын баласы Абдыжапар Абышовго тапшырылды.
Бул орден Улуу Жеңиштин 72 жылдыгына карата КМШ өлкөлөрүнүн алдындагы Көз карандысыз мамлекеттердин достугу жана улуттук аскерлердин иштери боюнча комитети тарабынан берилген. Аны аталган комитеттин төрагасынын кеңешчиси, Аба аскер десантынын генерал-майору Николай Лифанов тапшырды.
Кыргызстандык жоокердин сөөгү 2013-жылы "Память" издөө тобунун мүчөлөрү тарабынан Москва шаарынан 230 чакырым алыс жайгашкан Ржев районунун Погорелки айылында табылган. Мендеш Өмүралиев 1910-жылы Талас облусунун мурдагы Бакай-Ата районунда туулган.
Анын сөөгү былтыр Кыргызстанга алып келинген. Өмүралиев Киров аскер комиссариаты тарабынан 1941-жылы Кызыл Аскердин катарын толуктап, 1942-жылы согуш талаасынан дайынсыз жоголгон. Сөөктү казуу учурунда анын төш сөөгү минометтун окторунан жабыркап, колдорунда эки граната болгон.
