Эркин Каимов: таш кулатуу жолдогу коопсуздук үчүн жасалып жатат
Бишкек — Нарын — Торугарт автожолунун Боом капчыгайынын 120-чакырымында таш кулатуу иштери каттамдардын коопсуздугу үчүн жасалып жатат. Бул тууралуу "Кыргыз темир жолу" Улуттук компания" мамлекеттик ишканасынын маалымат катчысы Эркин Каимов билдирди.
Ал аталган жолдо 30-40 автомашина чогулуп калса таш кулатуу иштери токтотулуп, ИИМдин Кайгуул милициясы аларды улам өткөрүп турарын айтты.
"Андыктан, жүргүнчүлөр менен автомобиль айдоочулардан түзүлгөн ыңгайсыздыктар үчүн кечирим сурайбыз. Бул албетте, коопсуздукту камсыз кылуу максатында жасалып жатат", — деди Каимов.
Ал учурда бул иштерди аталган ишкананын жол чарбасы боюнча филиалы аткарып жаткандыгын кошумчалады.
