Алдын ала маалыматтар боюнча, үч жеңил унаа тең жогорку ылдамдыкта бараткан.
БИШКЕК, 9-апр. — Sputnik. Кемин районундагы беш адамдын өмүрүн алган ири жол кырсыктын чоо-жайын милиция иликтеп жатканын ИИМден кабарлашып, толугураак маалыматтарды жиберишти.
Кырсыктын кесепетинен бир унаа өрттөнүп, экинчиси металлга айланып калган.
Кырсык 8-апрелде саат 19.00дө Бишкек — Нарын — Торугарт жолунун 79-чакырымында, тагыраагы Чымкоргон айылындагы айланма жолдо катталган. Кырсыктын кесепетинен бир унаа өрттөнүп, экинчиси металлга айланып калган.
Үчүнчү унаанын айдоочусу менен жүргүнчүлөрү ар түрдүү жаракаттарды алышкан.
"Белгисиз себептерден улам чыгышты көздөй бараткан BMW үлгүсүндөгү унаа жолдун каршы тилкесине чыга калып, Toyota Mark 2 унаасы менен кагышкан. Артта келе жаткан Mersedes үлгүсүндөгү унаа дагы кагышкан", — деп айтылат маалыматта.
Катуу кагылышуунун айынан Toyota өрттөнүп, үч адам набыт болду. BMW үлгүсүндөгү унаанын айдоочусу менен жүргүнчүсү дагы алган жаракаттарынан улам көз жумган.
Ал эми Mercedes автосунда келе жаткан үч аял менен үч жашар бала ооруканага жаткырылган.
Учурда кырсык боюнча соттук-медициналык экспертиза дайындалып, тергөө амалдары жүргүзүлүп жатат. Алдын ала маалыматтарга караганда, үч унаа тең жогорку ылдамдыкта бара жаткан.
