БИШКЕК, 22-мар. — Sputnik. Нооруз майрамына карата Бишкектеги "Ак-Кула" ат майданында улуттук ат оюндары өтүп, аны көрүүгө келген шаар тургундары ипподромдун сахнасына, темир тосмолорго, айланадагы бактарга чейин чыгып кеткени социалдык тармактарга жарыяланып, коомчулукта нааразычылыктарды жаратты.
Мелдешти уюштурган "Көк-Бөрү" федерациясы кечээки башаламандыкка милиция кызматкерлеринин шалаакылыгы себеп болду деп эсептейт.
Ошондой эле ал Нооруз күнкү оюнга беш миң билет жасалса, анын 4,5 миңи гана сатылганын кошумчалады.
Ал эми Бишкек ШИИБинин маалымат кызматы 21-март күнү ат майданында иштеген кызматкерлерге чара көрүлөр-көрүлбөсү тууралуу маалымат берүүдөн баш тартууда.
Беш миңге жетпеген билет сатылган мелдешке 15 миңдин тегерегиндеги адам киргенин "Ак-Кула" ат майданынын директору Тынчтыкбек Акматбеков Sputnik Кыргызстан агенттигине билдирди.
"Ипподромдо отура турган 2,5 миң кишилик орун бар, ал эми жалпысынан алганда трибунага алты миңдин тегерегинде адам батат. Кечээ 15 миңдей киши келди. Баса, ипподромдо канчалаган иш-чаралар өткөрүлгөнү менен бизге тиешелүү унаа токтотуучу жай жок", — деди директор.
Анын айтымында, мамлекеттик деңгээлдеги ат оюндары өткөрүлгөн ипподромдун трибунасын кеңейтүүгө шаар мэриясы менен соттошуу иштери тоскоол болуп келет.
Бирок бүгүнкү күндө ат майданына ким жоопкер экени аягына чейин аныкталбай, иши сотто каралып жатканын мэриянын алдындагы Дене тарбия жана спорт башкармалыгынын директору Ырысбек Мааткабылов белгиледи.
"1990-жылдардын башында ипподромду Айыл чарба институту менен "Ак-Кула" акционердик коомуна бөлүп берген токтомду Ленин райондук соту жокко чыгарды. Эми алар сот чечимине макулбу же шаардык сотко кайрылабы, азыр белгисиз. Мэриянын балансына толугу менен өткөрүп алсак ат майданын модернизациялайбыз. Анткени ал эчактан бери эле оңдоого муктаж. Эң биринчи трибуналарды кеңейтүү маселеси турат. Батыш жагын узартып, дааратканаларды көбөйтөбүз", — деди Мааткабылов.
Белгилей кетсек, "Ак-Кула" ат майданынын жалпы аянты 57,4 гектарды түзөт.
