БИШКЕК, 3-мар. — Sputnik. Көп мамлекеттер демократия куруунун уникалдуу тажрыйбасын Кыргызстандан үйрөнүп жатат. Бул тууралуу президент Алмазбек Атамбаев Мамлекеттик желек күнүнө байланыштуу кайрылуусунда айтты.
Өлкө башчы өз сөзүндө "Манастагы" "кулаалы таптап куш кылдым, курама жыйып журт кылдым" деген тарыхый саптардын маани-маңызы желекте таасын камтылганын белгиледи.
"Мамлекеттик желегибиз азыр дүйнөнүн кайсы гана жеринде болбосун, эл аралык саясый, экономикалык, маданий, спорттук жана башка ири иш-чараларда көккө көтөрүлүп, кыргыз жараны экенибизге сыймыктануу сезими жаралды", — деди Атамбаев.
"Эл аралык уюмдардын соӊку баасы боюнча Кыргызстан КМШ мейкиндигинде эркиндик деӊгээли жогору турган сейрек өлкөлөрдүн катарында турат. Азыр, тетирисинче, көп мамлекеттер демократия куруунун уникалдуу тажрыйбасын бизден үйрөнүп жатышат", — деди өлкө башчы.
Сөзүнүн соңунда Атамбаев өлкөгө өнүгүү, элге бекем ден соолук, ачык асман, токчулук каалады.
