БИШКЕК, 1-мар. — Sputnik. Бишкектеги травматология жана ортопедия илим изилдөө борборунун башкы дарыгери Алмаз Кубатбеков Илим Карыпбековдун жашап кетүү мүмкүнчүлүгү бар экенин билдирди. Бул тууралуу Саламаттык сактоо министрлигинин өкүлү Елена Баялинова Facebook баракчасына жазды.
Белгилей кетсек, КТРКнын башкы директору Илим Карыпбеков 1-мартка караган түнү Бишкек жол кырсыгына кабылган. Ал айдап бараткан автоунаа жол жээгиндеги темир түркүктү барып сүзгөн.
"Дарыгер бейтаптын ич жагына эки саат операция жасалганын билдирди. Учурда бардык керектүү дары-дармектер, кан жетиштүү. Саат 5:00дө саламаттык сактоо министри Талантбек Батыралиев бейтапты көрүп, дарыгерлердин консилиумуна катышты", — деп Баялинова жазды.
Ал министр бул кырдаалды жеке көзөмөлүнө алганын кошумчалады.
