БИШКЕК, 1-мар. — Sputnik. Учурда Улуттук коопсуздук боюнча мамлекеттик комитеттин төрагасы Абдил Сегизбаев менен башкы прокурор Индира Жолдубаева Жогорку Кеңештин жыйынында Өмүрбек Текебаевдин айланасындагы суроолорго жооп берүүдө.
Белгилей кетсек, "Ата Мекен" фракциясынын лидери Текебаев 26-январда "Манас" аэропортунан кармалган. Ага карата Башкы прокуратура "коррупция" жана "алдамчылык" беренелери боюнча кылмыш ишин козгогон. 27-февралда депутат Бишкек шаарынын Биринчи Май райондук соту тарабынан 25-апрелге чейин эки айга камакка алынды.
Талкуунун жүрүшүндө "Ата Мекен" фракциясынын депутаты Наталья Никитенко Абдил Сегизбаевден кызмат орду расмий кандай аталарына кызыгып суроо узатты. Сегизбаев бул суроого жооп берген жок. Ортого төрага Чыныбай Турсунбеков кийлигишип, ким кандай суроо берсе ошондой жооп алып жатканын айтып, процедура боюнча гана суроолорду берүүгө чакырды.
Депутаттар Текебаевдин айланасындагы маселе боюнча суроо берүү үчүн жазылган бардык депутаттар сүйлөп болгонго чейин жыйынды улантууну колдошуп, танаписке чыкпай турган болушту.
