БИШКЕК, 24-фев. — Sputnik. Жогорку Кеңештеги "Ата Мекен" фракциясынын депутаты Алмамбет Шыкмаматов Улуттук коопсуздук мамлекеттик комитетине сурак берип чыкты. Бул тууралуу аталган комитеттин маалымат кызматы билдирди.
Буга чейин Башкы прокуратура Шыкмаматовго карата Эсеп палатасында аудитор болуп иштеп турганда мыйзам бузган деп иш козгогон.
Шыкмаматов УКМКга саат 10.00дө сурак берүү үчүн кирип кеткен.
Депутаттын тарапташтары УКМК имаратынын алдында кетпей турушту. Алар эл өкүлүн сурактан бошотууну талап кылышкан. Милиция кызматкерлери чогулган эл УКМКнын дарбазасына чыга баштаган учурда токтотууга аракет жасап, натыйжада мушташ чыгып кеткен.
Бишкек ШИИБдин маалымат кызматынын билдирүүсүнө караганда, депутаттын тарапташтары Шыкмаматов бошотулганда дароо тарап кетишкен.
"Милиция менен митингге чыккандардын ортосунда бир учурда мушташ чыгып кетти, бирок окуядан эч ким жабыркаган жок", — деп жазылат маалыматта.
"Ата Мекен" фракциясынын депутаттары экинчи жолу суракка чакырылып жатат. 26-декабрда Башкы прокуратура Аида Саляновага карата Юстиция министри болуп турган кезде Алексей Елисеевдин адвокаттык лицензиясын кызмат абалынан кыянаттык менен пайдаланып калыбына келтирип берген деп кылмыш ишин козгогон.
