Депутат Алмамбет Шыкмаматов эч жакка качпай, укугун коргой тургандыгын Sputnik Кыргызстан агенттигине билдирди.
Эске сала кетсек, Башкы прокуратура Шыкмаматовго карата Эсеп палатасында аудитор болуп иштеп турганда мыйзам бузган деп иш козгоду.
Шыкмаматов менен чогуу Эсеп палатасынын кызмат адамдарына "коррупция" жана "документтерди жасалмалоо" беренелеринин негизинде айып тагылууда.
"Бул кылмыш ишин козгоодо саясий боек бар экени айдан ачык көрүнүп турат. Эч кандай негиз жок. Ал жерде Эсеп палатасы төрт Mercedes унаасын тендер аркылуу сатып алган. Ал тендерди бир компания утуп алган. Аталышы эсимде жок. Ошол компания төрт унаанын бирин жубайымдан 13 миң долларга сатып алган экен. Аялым менен компания кандайча байланышкандыгын билбейм", — деди Шыкмаматов.
Эл өкүлү эч жакка качпай тургандыгын айтып, адвокат жалдап укугун коргой тургандыгын кошумчалады. Мындан сырткары, аялынан сатып алынган унаа бүгүнкү күнгө чейин мыкты кызмат кылып жаткандыгын баса белгиледи.
