БИШКЕК, 20-фев. — Sputnik. Операция жасалган жеринин тигиши сөгүлүп кеткен бир айлык Жантай бүгүн кайрадан ооруканага жаткырылганын теле алып баруучу Ассоль Молдокматова өзүнүн Facebook баракчасына жазды.
Буга чейин Жантайдын таенеси Эне жана баланы коргоо борборунун дарыгерлерине ЖМК аркылуу нааразычылыгын билдирип чыккан.
Бала табарсыктын экстрофиясы (табарсыгы сыртына чыгып төрөлгөн) менен төрөлгөндүктөн Жал кичирайонундагы Эне жана баланы коргоо улуттук борборуна жиберилген. Ал жактан ага урология бөлүмүнүн башчысы эки ирет операция жасаган.
"Эки операция тең ийгиликсиз болуп калды. Жараты толук жакшы боло электе эле баланы үйгө чыгарып коюшту. Операция кылган хирургга барып, "ачык жаратыбыз менен үйгө кетүүгө эрте эмеспи?" деп сурайын десем, кесиптеши "эмгек өргүүсүнө чыгып кетти, өзүнө кайрылгыла" деп койду. Бала үйдө 2-3 күн гана болду. Азыр акыбалы оор. Бүгүн минтип №3 балдар ооруканасына келдик. Башкы дарыгер Талант Өмүрбеков өзү кабыл алып, бир катар кароолорду өткөрдү. Операция жасайбыз, бирок бала кичине торолсун деп айтты", — деп өзүнүн атын атагысы келбеген наристенин таенеси билдирди.
Ымыркай Эне жана баланы коргоо борборунан чыгарылып жатканда акыбалы жакшы болгондугун ага операция жасаган Урология бөлүмүнүн башчысы Болот Эсенбаев Sputnik Кыргызстан агенттигине билдирди.
Баланын азыркы акыбалын билүү үчүн ал жаткырылган Медициналык тез жардам клиникалык балдар ооруканасынын дарыгерлери менен байланышуу мүмкүн болгон жок.
