БИШКЕК, 19-фев. — Sputnik. Бишкекте эртең, 20-февраль күнү, Чоң-Алайдагы кар көчкүдөн жабыркаган үй-бүлөлөргө жардам берүү иш-чарасы өтөт. Бул туурасында "Чоң-Алай элдик бирикмесинин" төрагасы Улукбек Карыбек уулу билдирди.
19 Бирдин айы 2017, 19:09
Эскерте кетсек, бүгүн таңда аталган аймакка кар көчкү түшүп, эки тамды басып калган. Ичиндеги 11 кишини кошуналар алып чыгууга үлгүрүп, алар ооруканага жөнөтүлгөн. Түшкө маал куткаруучулар кар алдынан жабыркаган бир үй-бүлөнүн 3 жана 4-класста окуган уул-кызынын сөөгүн таап чыккан.
Ушу тапта 10 киши аймактык ооруканада дарыланып жатат.
Жардам көрсөтүүнү каалагандар эртең Бишкек шаарындагы Жибек-Жолу — Абдрахманов көчөсүндө жайгашкан "Гоин" соода үйүндө саат 16.00дөн 18.00гө чейин келип катышса болот. Жардамдар акчалай түрүндө чогултулат. Байланыш телефону: 0778-494-205; 0559-442-504.
