Башкы прокуратура Алмамбет Шыкмаматовго кылмыш ишин козгоду

Жазылуу
Кылмыш ишин иликтөө Улуттук коопсуздук мамлекеттик комитетине тапшырылды.

БИШКЕК, 17-фев. — Sputnik. Кыргызстандын Башкы прокуратурасы Жогорку Кеңештеги "Ата Мекен" фракциясынан депутат Алмамбет Шыкмаматовго кылмыш ишин козгоду. Бул тууралуу башкы көзөмөл органдын маалымат кызматы билдирди.

Шыкмаматов менен чогуу Эсеп палатасынын кызмат адамдарына "коррупция" жана "документтерди жасалмалоо" беренелеринин негизинде иш козголгон.

Маалыматка ылайык, 2011-жылы ошол учурда Эсеп палатасынын төрагасы Сабырбек Молдокулов кызматтык автоунаа сатып алуу боюнча тендердик комиссия түзүү боюнча буйрук чыгарган.

"Комиссиянын төрагасы аудитор Ж.Иманалиев, тендердик комиссиянын мүчөлөрү А.Кангелдиев, А.Шыкмаматов, Эсеп палатасынын аппарат жетекчиси Т.Чормонов, бөлүм башчы Б.Жаныбеков, финансы-чарба бөлүмүнүн башкы адиси А.Романова жана транспорт боюнча инженер Н.Бедельбаев болгон", — деп жазылат билдирүүдө.

Тендердик комиссияны түзүү боюнча буйрук чыкканы менен эч кандай тендер өткөрбөстөн эле өздөрү барып жаккан машиналарды тандап алган. Маалыматта алардын жасалма документтер менен 2000-2001-жылы өндүрүштөн чыккан Mercedes Benz E-Класс үлгүсүндөгү автоунааларды сатып алганы айтылат.

Ата Мекен фракциясынын депутаты, мурунку башкы прокурор Аида Салянованын архивдик сүрөтү - Sputnik Кыргызстан
Салянованын ишин депутаттык комиссия да иликтемей болду
Мындан тышкары, 2011-жылы 5-октябрда тендер өткөнү боюнча жалган документ түзүлгөн. Тендерге "Би Стар" ЖЧК (4 миллион 265 миң сом сунуштаган) менен "Барат Люкс" ЖЧК (3 миллион 368 миң 831 сом сунуштаган) компаниялары катышкан. Жыйынтыгында "Барат Люкс" ЖЧКсы жеңүүчү деп табылган.

Шыкмаматов өзүнүн жеке кызыкчылыгын көздөп "Барат Люкс" ЖЧКсынын тендердик арызына аялынын 2000-жылы өндүрүштөн чыккан Mercedes Benz Е 320 үлгүсүндөгү автоунааны 14 637 долларга баалап киргизип сатып жиберген. Бирок ошол учурда мындай үлгүдөгү машинанын базардагы баасы 10 миң доллардан кем болбогону Башкы прокуратура тараткан билдирүүдө белгиленет.

Өз кезегинде Жогорку Кеңештин депутаты Алмамбет Шыкмаматов бул аракетте саясий боёк бар экенин Sputnik Кыргызстан агенттигине билдирди. Депутат ошондой эле тендер өткөрүүдө эч кандай мыйзам бузуу болбогонун айтып, адвокат жалдап ишти аягына чейин чыгара турганын баса белгиледи.

Кылмыш ишин иликтөө Улуттук коопсуздук мамлекеттик комитетине тапшырылды.

Жаңылыктар түрмөгү
0